ಮಾನವ ಅಂದಮೇಲೆ ಒಂದು ಗಂಡು-ಹೆಣ್ಣು ಪರಸ್ಪರ ಆಕರ್ಷಣೆ, ಪ್ರೀತಿ, ಬಾಂಧವ್ಯ ಎಲ್ಲವೂ ಸಹಜ. ಪ್ರಕೃತಿಯ ನಿಯಮದಂತೆ ಆ ಇಬ್ಬರ ಮಿಲನದಿಂದ ಸಂತಾನ ಅಭಿವೃದ್ಧಿ ಮಾನವನ ವಂಶಾವಳಿ ಪೀಳಿಗೆಯ ಉದ್ದಾರ.
ಆದರೆ ಇಲ್ಲಿ ಪುರುಷ-ಪುರುಷ ಮಿಲನ ಸಹಜವೇ ಇಲ್ಲ ಅಸಹಜವೇ ಎನ್ನುವ ತೀವ್ರ ಗೊಂದಲ ಕಾಡುತ್ತಿವೆ. ಸಹಜ ಕ್ರಿಯೆಯಂತೆ ಸಿಗದ ಈ ಪುರುಷ-ಪುರುಷ ಪ್ರೀತಿ (ಆಕರ್ಷಣೆ) ಸಿಕ್ಕಾಗ ಏನೋ ಸಂತೋಷ ಮನಸ್ಸಿನ, ದೇಹದ ಮಿಲನ ಬಯಸಿ ಸುಖವನ್ನ ಅರಸಲು ತಡಕಾಡುತ್ತದೆ ಈ ಮನ. ಆದರೆ ಅದೇ ನಿಜವಾದ ಪ್ರೀತಿ ಸಿಗದೇ ಇದ್ದಾಗ ಅಲ್ಲಿರುವ ಆತಂಕ ದುಗುಡಕ್ಕೆ ಯಾವುದೇ ಗಂಡು-ಹೆಣ್ಣಿನ ವಿರಹ ಪ್ರೇಮಕ್ಕಿಂತ ಕಡಿಮೆ ಏನಿಲ್ಲ. ಇಲ್ಲೂ ಪ್ರೀತಿ ಪ್ರೇಮ ಸ್ನೇಹ ಆಕರ್ಷಣೆ ಎಲ್ಲವು ಇದೆ ಆದರೆ ಒಂದು ಜವಾಬ್ದಾರಿಯುತ ಸಂಬಂಧಗಳಿಲ್ಲ. "ಇಂದು ನೀ ನನ್ನವ ನಾಳೆ ನೀ ಯಾರೋ ..." ಎನ್ನುವ ಸ್ಥಿತಿಯಲ್ಲಿದ್ದೇವೆ. ಹೊಸತನ್ನು ಹುಡುಕುವ ಭರದಲ್ಲಿ ತಮ್ಮತನವನ್ನ ಕಳೆದುಕೊಳ್ಳುತ್ತಾ ಮುಂದಿನ ಜೀವನದ ಬಗ್ಗೆ ಚಿಂತಿಸದೆ, ಈಗಿನ ತಕ್ಷಣದ ಮಾನಸಿಕ, ದೈಹಿಕ ಆಸೆಗಳನ್ನ ಪೂರೈಸಿಕೊಳ್ಳುವುದರಲ್ಲಿ ನಿರತ..
ಆದರೆ ವಯಸ್ಸು ಆಕರ್ಷಣೆ ಎಲ್ಲವೂ ಕಡಿಮೆ ಆಗುತ್ತಾ ಬರುವಾಗ ಒಂಟಿತನ ಕಾಡದೆ ಇರುವುದಿಲ್ಲ. ಏನೇ ಇರಲಿ ಮಾನವ ಸಮಾಜ ಜೀವಿ ಜತೆಗಾರ ಬೇಕು ಉತ್ತಮ ಸಂಗಾತಿ , ಬಾಳ ಸಂಗಾತಿ ಬೇಕು.. ಸಿಗುವನೇ ಆ ಸಂಗಾತಿ ಎನ್ನುವ ಜೀವಿ?
ಕಾಣದಾ ಕಡಲಿಗೆ ಹಂಬಲಿಸಿದೆ ಮನ..
ಕಾಣದಾ ಕಡಲಿಗೆ ಹಂಬಲಿಸಿದೆ ಮನ..
ಕಾಣಬಲ್ಲೆನೆ ಒಂದು ದಿನ ?
ಕಾಣದ ಕಡಲು, ಮುಗಿಲ ಮಲ್ಲಿಗೆ, ನಿಲುಕದ ನಕ್ಷತ್ರ, ಮೃಗತೃಷ್ಣ, ಮರೀಚಿಕೆ , ಕಾಮನಬಿಲ್ಲು, ಆಕಾಶ ದೀಪ, ಬಿಸಿಲುಗುದುರೆ
ಎಲ್ಲವು ನೀನಾಗಬೇಡ ಗೆಳೆಯ. ನನ್ನಂತೆ ನಿನಗೂ ಒಂದು ಮನಸಿದೆ..
"ಆ ಮನಸಲ್ಲಿ ಚೂರು ಜಾಗ ಬೇಕಿದೆ"